Bhaarat Ko Haraane Ke Liye Sarvashreshth Pradarshan Kareinge Cook

Cricket »

Bhaarat Ko Haraane Ke Liye Sarvashreshth Pradarshan Kareinge  Cook

Rajkot: Bhaarat par test shrunkhala mein jeet darj karne ke baavajood England ke kaptaan Alastair cook mejabaan team ke palatavaar se chintit hain aur unka maanana hai ki unki 'Underdog' team ke khilaadiyon ko one-day shrunkhala jeetne ke liye sarvashreshth pradarshan karna hoga. Cook ne navanirmit Saurashtra cricket sangh stadium par shukravaar ko hone vaale pehle match se poorv kaha, ''Ham shrunkhala mein underdog hain lekin hamaare paas kai vishvastareeya khilaadi hain. Shrunkhala jeetne ke liye sabhi ko apna sarvashreshth pradarshan karna hoga. '' Bhaarat mein 28 baras baad team ko test shrunkhala mein jeet dilaane vaale kaptaan ne kaha ki pramukh khilaadiyon ki chot ke kaaran team mein anubhav ki kami hai. Unhonne kaha, ''Hamaare paas anubhavaheen team hai. Kai anubhavi khilaadi chot aur rotation pranaali ke kaaran baahar hai lihaaja in khilaadiyon ke liye yeh badi chunauti hogi. '' Bhaarat-A aur Delhi ke khilaaf donon abhyaas match mein mili haar ke baare mein cook ne kaha ki vah haar ke saath shuruaat naheen chaahate the. Unhonne kaha, ''Yeh achhi shuruaat naheen hai. Main pehla aur doosra match naheen khel saka lekin humne pichhle match mein behtar pradarshan kiya. Hamein aur mehnat karni hogi. '' England ne aakhiri baar 1984-85 mein Bhaarat mein one-day shrunkhala jeeti thi. Cook ne kaha ki bhaarateeya wicketon par galati ki gunjaaish bahut kam hai. Unhonne kaha, ''In pichon par galati ki gunjaaish kam rahati hai. Pichhli baar aur do abhyaas maichon mein hamein yahaan iska ehsaas ho gaya. Yahaan line aur length se bhatakne par bhaari khaamiyaaja bhugatna pad sakta hai. '' Unhonne kaha ki shuruaati wicket lena kaafi aham hota hai jisse virodhi par dabaav banta hai. Van-de cricket ke nae niyamon ke baare mein unhonne kaha ki bhaarateeya haalaat mein in niyamon ka utana asar naheen hoga jitna England ya Australia mein hota hai. Unhonne kaha, ''Yahaan par niyamon ka utana asar naheen rahega jitna Australia ya England ki uchhaalabhari pichon par hota hai. Mainne Delhi ke khilaaf kaptaani ki aur poore samay circle ke bheetar paanch khilaadiyon ka rahana kuchh alag tha. ''

Bhaarat Ko Haraane Ke Liye Sarvashreshth Pradarshan Kareinge Cook http://www.angrejinews.com/pic/252