Ameriki Madhya Varg Ki Aamdani Ghati, Canada Aage

Business »

Ameriki Madhya Varg Ki Aamdani Ghati, Canada Aage

Washington America ko svarg maanane vaale is khabar se thoda maayoos ho sakte hain. Pichhle kuchh saalon mein ameriki madhya varg ki aamdani kam hui hai aur vah duniya ka sabse ameer madhya varg naheen rah gaya hai. Canada ka madhya varg kamaai ke maamale mein usase aage nikal gaya hai. New York times mein prakaashit ek stadi ke mutaabik yoon to America ka aarthik graaf duniya ke aur deshon jaisa hi, balki usase kaheen behtar hai, lekin madhya varg ki haalat patali hui hai. Ameriki madhya varg ameeri mein Europe ke madhya varg se abhi bhi aage hai lekin unke beech aay ka antar kam hua hai. 35 varshon ke aankadon ke aadhaar par kiye gaye is adhyayan ke mutaabik ameriki gareebon ki haalat Europe aur Canada ke nirdhanon ki tulana mein badatar hui hai. Madhya varg ki aamdani 1980 se 2000 ke beech 20 feesadi badhi, lekin uske baad kamobesh sthir ho gayi. Par Canada mein yeh badhti rahi, aur keval 2000 se 2010 ke beech ismein 20 pratishat ki badhotri hui. Madhya varg ki haisiyat kaheen na kaheen ameriki ikaunami ke sankat ko darshaati hai. Ameriki prejideint Barack Obama ko iska ehsaas hai. Apni doosari paari ki shuruaat ke saath hi vah doharaate rahe hain ki madhya varg par gahra dabaav hai. America ka madhya varg saath ke dashak mein khoob fala-foola, jab vahaan bahuraashtreeya companiyon ka ubhaar hua. Lekin 1972 mein tel ki keematon mein hui behataasha badhotri ne America aur pashchimi deshon ke mainyoofaikchirang sector ki kamar tod kar rakh di. Madhya varg ne naukri paane ke liye service sector ka rukh kiya, magar yahaan vetan apekshaakrut kam tha. Haalat yeh hai ki America mein takareeban 40 saal se ausat vetan mein koi badhotri naheen hui hai. Beete do dashakon se service sector par cheen aur Bhaarat ka dabadaba badha hai. Ameriki madhya varg vitt, kaanoon aur akaaunting jaise oonche vetan vaale kshetron mein naukriyaan khota gaya hai, lekin karj lekar jeene aur shaahakharchi karne ka usaka mijaaj bana raha. 2008 ke ant tak uske saamane karjon ka pahaad khada ho gaya, jisse vah aaj bhi naheen ubar paaya hai. America mein madhya varg kamjor hua hai lekin dhani ya super rich class chhalaangein maarta hua badh raha hai. Maana jaata hai ki apne raajaneetik prabhaav se vah apne paksh mein neetiyaan banava leta hai. Yeh asantulan bhavishya mein vahaan kai tarah ki samasyaaen paida kar sakta hai.

Ameriki Madhya Varg Ki Aamdani Ghati, Canada Aage http://www.angrejinews.com/pic/48439