America Ne Bhaarat, Pak Sthit Apne Raajanayikon Se Tanaav Ghataane Ko Kaha

World »

America Ne Bhaarat, Pak Sthit Apne Raajanayikon Se Tanaav Ghataane Ko Kaha

Washington: America ne do bhaarateeya sainikon ki hatya ke baad Bhaarat aur Pakistan ke beech badhte tanaav par chinta jataate hue donon deshon mein niyukt apne raajadooton ko tanaav kam karne ke liye donon sarkaaron ke saath kaam karne ka nirdesh diya hai. America ki videsh vibhaag ki pravakta Victoria nulaind ne bataaya, unhonne (videsh mantri Hillary Clinton) ne kal aur aaj dakshin Asia mein maujood hamaare logon se baat ki. Unhonne hamaare raajadooton ko un sarkaaron ke saath kaam karne ka nirdesh diya hai aur ve aisa kar rahe hain. Victoria ne kaha, donon deshon mein raajadoot star par baat ki gayi hai. Unhonne donon deshon ke beech shaanti kaayam rakhane ki appeal ki hai. Unhonne kaha, ham Kashmir mein niyantran rekha par hinsa ki khabaron ko lekar chintit hain. Hamaara maanana hai ki Pakistan ab vaarta kar raha hai aur uchch star par in muddon par kaam kar raha hai. Unhonne kaha, ham donon pakshon se hinsa khatm karne ke liye kadam uthaane ki maang kar rahe hain. Ham donon deshon ke beech rishte behtar karne ki kisi bhi koshish ka purajor samarthan karna jaari rakheinge. Humne in haaliya ghatnaaon ke baare mein donon sarkaaron se bhi baat kar unase ek-doosare se baat karne aur shaanti banaae rakhane ki appeal ki hai. America donon deshon se tanaav ghataane ke baare mein baat kar raha hai. Victoria ne kaha ki hamaara maanana hai ki Bhaarat aur Pakistan ne haal ke varshon mein kai mushkil muddon par achhi khaasi pragati ki hai. Pentagon ke press sachiv George little ne kaha, ham ummeed karte hain (hamaare Pakistani aur bhaarateeya saajhedaar) ki ham kshetr mein shaanti aur sthirta kaayam rakh sakte hain. Raksha mantri ne Bhaarat sahit is kshetr ke daure mein iski pushti ki hai. George ne ek savaal ke javaab mein kaha ki raksha mantri Leon peneta Bhaarat aur Pakistan ke beech tanaav ke muddon evam aitihaasik tanaav se achhi tarah vaakif hain. Gaurtalab hai ki Pakistan ke sainikon ne Jammu-Kashmir ke punchh sector mein ghuskar Bhaarat ke ek gashti dal par hamla kiya aur do sainikon ki hatya kar di.

America Ne Bhaarat, Pak Sthit Apne Raajanayikon Se Tanaav Ghataane Ko Kaha http://www.angrejinews.com/pic/336